Bruce Wayne : Space Pioneer, by Ross Crawford

Bruce Wayne: Space Pioneer

Whit if Bruce Wayne wis a real guy?
Whit wid he actually be like?
Wid he still run aboot each nicht
Getting intae a ficht
Wae every petty criminal in the city?
Wid he?
Say ye pit him oan a fixed-term contract:
How wid he react?
Wid he sit through an annual review
Tae discuss aw the jaws he’s cracked?
Punchin fuck oot the symptom
Never curin the cause
Is much mair fun
Than trying tae change the laws
“Least ah dinnae kill,” he’d cry
“An ah’m no gonnae justify
Masel tae the likes ae you.”
But it starts tae make ye hink:
If he’s a billionaire who’s only kink
Is dressing up in aw that bat gear
And makin wee guys pish in fear
Is he helpin or hinderin?
Is he actually a guid yin?
Ah bet ye if Bruce Wayne wis a real guy
He’d prolly jist try tae get tae the moon
Like aw the ither silver-spoon
Billionaires blastin aff intae space
Auld Brucey boy racin big bald Bezos
Tae build the first galactic base
Nae cosmic threats tae fight
Fur this Dark Knight
But he still cannae forget
That his parents are deid
Instillin him wae this insatiable need
Tae dae them baith proud
And so he has vowed
That in the name ae the slain
Thomas an Martha Wayne
He’ll lead an interstellar trip
Perform a low-gravity flip
Inside a bat-shaped spaceship.

Ross Crawford is a writer/scriever based in Stirling, Scotland. He mostly takes his inspiration from the history and nature of Scotland, but his head can be turned by sci-fi and superheroes. He writes in Scots, English, and Gàidhlig. You can find him on Twitter at @RRMCrawford